هێلا گەرم بۆ ڕێگریکرنێ ژ خۆکوشتنێ
٨٠٠٢٥٠٥٠

پێشەکیەک دەربارەی تیمێ هێلا گەرم
هێلا گەرم بۆ ڕێگریکرنێ ژ خۆکوشتنێ یا سەر ب پەیمانگەها IPP ڤە ل سالا ٢٠٢١، ژلایێ پەیمانگەها چارەسەریا دەرونی و ترۆمایا دەرونی – زانکۆیا دهۆک ڤە هاتیە دامەزراندن. پرۆژە ژلایێ حکومەتا ئەلمانی و رێکخراوێن ئەلمانی ڤە دهێتە پارەدارکرن.

هێلا گەرم بۆ ڕێگریکرنێ ژ خۆکوشتنێ یا IPP پشتەڤانیەکا پسپۆری و نهێنی پێشکێشی وان کەسان دکەت یێن رووبڕووی هزرێن خۆکوشتنێ یان تەنگاڤیا هەستی یا دژوار دبن. خزمەتا مە یا سەرەکی هێلا گەرم یا فریاکەفتنێ یە بۆ ڕێگریکرنێ ژ خۆکوشتنێ (٨٠٠٢٥٠٥٠)، یا کو لسەرانسەری حەفتیێ ٢٤/٧ بەردەستە. دەمێ تو پەیوەندیێ دکەی، تیمێ مە یێ چارەسەرکەرێن دەرونی یێن خودان ئەزموون پشتەڤانیەکا بلەز و بێ لایەن د ژینگەهەکا ئارام و نهێنی دا پێشکێش دکەن، دا هاریکاریا تە بکەن کو د قەیرانا خۆ دا دەرباز ببی.

ئەڤ خزمەتا ب خۆڕایی بۆ هەر کەسەکی یە یێ هەست ب بێهیڤیبوون، گەفکبوون، یان نقومبوون د ئێشانا هەستی دا دکەت. هەروەسا ئەم داخوازێ ژ هەڤال و خێزانان دکەین کو پەیوەندیێ ب مە بکەن ئەگەر ئەو نیگەران بن دەربارەی گوهۆڕینا رەفتارا کەسەکێ خۆشتڤی یان هزرێن وی یێن نەرێنی بەرامبەر ژیانێ. تیمێ مە رێنماییان لسەر بنەمایێ باوەریا مە یا سەرەکی پێشکێش دکەت کو قەیرانێن خۆکوشتنێ یێن دەمکی نە و چارەسەریێن باشتر یێن مومکن هەنە. ئەم لێرەینە دا هاریکاریا تە بکەین کو هیڤیێ و رێکەکێ بۆ پێشڤەچوونێ ببینی.

زێدەباری دەستێوەردانێ د قەیرانان دا، ئەم پابەندین ب پشکداریا جڤاکی یا چالاکانە. ئەم کەمپینێن هشیارکرنێ و سمینارێن رەوشەنبیری ل جهێن جۆراوجۆر یێن جڤاکی رێکدئێخین، کو زانکۆ، قوتابخانە، سەنتەرێن جڤاکی، کەمپ و فورەمێن گشتی بخۆڤە دگرن. ئارمانج ژ ڤێ گەهاندنێ شکاندنا وێ شەرمێ یە یا دەوروبەرێ ساخلەمیا دەرونی گرتی، رەوشەنبیرکرنا جەماوەریە دەربارەی نیاسینا نیشانێن هشداریکەر، و پشتڕاستبوونە ژ وێ چەندێ کو هەمی کەس بزانن کو هاریکاری یا بەردەستە. ب رێکا هاندانا دانوستاندنێن ڤەکری، ئەم کار دکەین بۆ ئاڤاکرنا جڤاکەکێ خۆراگرتر و پشتەڤانتر، کو تێدا خواستنا هاریکاریێ دهێتە هاندان و وەک نیشانەکا بهێزیێ دهێتە تێگەهشتن.

ئەرکێن تیمێ ڕێگریکرنێ ژ خۆکوشتنێ

• ئەرکێ سەرەکی یێ ڤی تیمی ئەوە کو ب رێکا وەرگرتنا پەیوەندیێن تە لسەرانسەری ٢٤ دەمژمێران د رۆژێ دا گوهداریێ ل تە بکەت.
• پێشکێشکرنا پشتەڤانیێ ب چارەسەریا دەرونی بۆ ڕێگریکرنێ ژ خۆکوشتنێ.
• هاریکاریکرنا هەر کەسەکێ پەیوەندیێ ب مە بکەت.
• هەمی پێزانینێن تە یێن کەسی دێ ب نهێنی هێنە پاراستن.

ئەگەر تو هزرێ د خۆکوشتنێ دا دکەی:

• راوەستە — چ کردارەکێ بۆ زیان گەهاندن ب خۆ نەکە.
• پێدڤی ناکەت تو لسەر هزرێن خۆ یێن خۆکوشتنێ کار بکەی.
• هزر و هەلوێستێن تە دشێن بهێنە گوهۆڕین.
• بەریا هەر کردارەکێ، دگەل کەسەکی باخڤە، دبیت ئەندامەکێ خێزانێ یان هەڤالەکێ نێزیک بیت.
• پەیوەندیێ ب ڤێ هێلا گەرم بکە بۆ پشتەڤانیا تە.
• ئەگەر پەیوەندیکرن بۆ تە یا ب زەحمەت بیت، هیڤیدارین نامەیەکێ بۆ مە بهنێرە.
• بۆ نها هەول بدە سەلامەتیا خۆ ب پارێزی و بچیە جهەکێ دی.
• هەول بدە تێبگەهی کو ئەڤە رەوشەکا دەمکی یە، و ل بیرا تە بیت کو سەدەمێن دی بۆ ژیانێ هەنە.
• خۆکوشتن چارەسەریا درست نینە بۆ ئاریشەیێن تە یێن نها، رەوشا تە یا دژوار یا دەمکی یە. ئەم تێگەهشتنێ د ئێشانا تە دا دکەین، لێ پشتڕاست بە کو چارەسەریێن باشتر ل دەف مە هەنە بۆ تە.

نیشانێن هشداریکەر یێن کو دڤێت خێزان و هەڤال بزانن:
ئەگەر ئێک ژ خزم یان هەڤالێن تە نیشانێن ل خوارێ هەبن، یان ئەگەر تە دیت کو هزر یان رەفتارێن وان دهێنە گوهۆڕین و هزرێن نەرێنی بەرامبەر ژیانێ هەنە. تو دشێی پەیوەندیێ ب مە بکەی بۆ رزگارکرنا ژیانا کەسەکی.

ئاخفتن دەربارەی:

• حەزا مرنێ.
• بوونە بارگرانی لسەر یێن دی.

هەستکرن ب:

• بێهیڤیبوون، یان گەفکبوون، یان کو چ سەدەم بۆ ژیانێ نینن.
• خەمگینیا دژوار، یان دلقەلەقیا زێدە، یان تێکچوون، یان هەستکرن ب توورەییەکا مەزن.
• هەستکرن ب گونەهەکا یان شەرمەکا مەزن.
• ئێشانا هەستی یان جەستەیی یا نەهێتە راگرتن.

گوهۆڕین د رەفتارێ دا وەک:

• پلاندانان یان لێگەریان لسەر رێکان بۆ خۆکوشتنێ.
• خۆڤەکێشان ژ هەڤالان، ماخێرخاستن، و نڤیسینا وەسیەتنامەیێ.
• نیشاندانا گوهۆڕینێن دژوار د تەبیعەتی دا.
• کرنا کارێن ب مەترسی وەک هایتنا ترۆمبێلێ ب لەزاتیەکا گەلەک زێدە.
• خوارن یان نڤستنا پتر یان کێمتر ژ ئاسایی.
• بکارئینانا ماددەیێن هۆشبەر یان کحولێ ب بەردەوامی.

ئەگەر ئەڤ نیشانێن هشداریکەر لسەر تە یان کەسەکێ تو دنیاسی هەبن، ب لەزترین دەم هاریکاریێ بخوازە، ب تایبەتی ئەگەر رەفتارێن وان نوو بن یان ڤان دوماهیان زێدە بووبن.