کلینیکا IPP یا شنگال بۆ چارەسەریا دەرونی ل سالا ٢٠٢٢ ژلایێ پەیمانگەها چارەسەریا دەرونی و ترۆمایا دەرونی / زانکۆیا دهۆک ڤە، ب هەڤکاری دگەل زانکۆیێن ئەلمانی ل ویلایەتا بادن-ڤۆرتمبێرگ هاتیە دامەزراندن. پارەدەرێ سەرەکی یێ کلینیکێ حکومەتا ئەلمانیایە زێدەباری زانکۆیا دهۆک. خزمەتگوزاری ل کلینیکێ ب خۆڕایی نە بۆ هەمی خەلکی.

پشتی وەلاتێ مە د گەلەک جۆرێن کۆمکوژی، جینۆساید و ترۆمایان (شۆکێن دەرونی) را دەربازبووی، کو هەتا نوکە ژی بەردەوامن، گەلەک کەسان هەست ب نەخۆشی یان خەمگینیێ د ژیانا خۆ یا رۆژانە دا کرن، و ژ هزرێن زێدە دەربارەی تشتێ رویدای دنالینن. ئەڤ کلینیکە جهەکە کو خەلک دشێن تێدا هەستێن خۆ دەربرن، زەحمەتیێن ژیانا خۆ چارەسەر بکەن، و ب رێکێن پیشەیی و زانستی یێن سەلماندی هاریکاریێ وەربگرن.

خزمەتگوزاریێن چارەسەریا دەرونی یێن ب خۆڕایی بۆ هەمی خەلکێ دەڤەرێن شنگال بەردەستن، ب تایبەتی بۆ هەردوو کەمپێن سنوونێ و کەبەرتوو، کو گەلەک خەلک ژ جهێن خۆ ئاوارە بووینە و پشتی شەڕی ژ لایێ دەرونی ڤە ئێشاینە.