ئەڤرۆ رێکەڤتی ٢١ـی چریا ئێکێ ٢٠٢٥، و د ڕێورەسمەکێ دا کو کووراتیا پەیوەندیێن د ناڤبەرا هەرێما کوردستانێ و ئەلمانیا دیاردکر، زانکۆیا دهۆک پێشوازی ل شاندەکێ بلندێ حکومەتا ئەلمانیا کر ب سەرۆکاتیا رێزدار فلۆریان هاسلەر، وەزیرێ دەولەتێ بۆ هەماهەنگیا سیاسی ل وەزارەتا دەولەتێ یا بادن-وۆرتمبێرگ.

د شاندێ مێهڤان دا، هەروەسا هەر ئێک ژ رێزداران خاتوون ئایلا کاتێلتێپە، پەرلەمانتارا پارتا کرستیان، خاتوو ئەلینا فلینک-تراوشێل، پەرلەمانتارا پارتا دیمۆکراتا ئازاد، نوینەرێن ڕێکخراوا SEZ رێزدار فیلیپ کایل و لوریدس نۆڤاک، و رۆژنامەڤان لودگەر مولەرس ژ ڕۆژناما Schwäbische Zeitung و ڕێکخراوا کاریتاس، ئامادە بوون.

د ڕێورەسمەکی دا، ب ئامادەبوونا د. داود سلێمان ئەتروشی سەرۆکێ زانکۆیا دهۆک، د. لقمان هادی حەسەن، هاریکارێ سەرۆکێ زانکۆیێ، د. یان ئیلهان کیزیلهان، راگرێ پەیمانگەها چارەسەریا دەروونی و تراومایێ و ئەندامێن جڤاتا زانکۆیێ ستاف و قوتابی و دەرچووی و چارەسەرکارێن د چارچۆڤێ پەیمانگەهێ دا کاردکەن، د. یان ئیلهان کیزیلهان، ب گەرمی بخێرهاتنا شاندێ مێهڤان کر و د پەیڤەکێ دا ئاماژە دا دیرۆک و ئارمانجێن دامەزراندنا پەیمانگەهێ، کو وەکو بەرسڤدانەکا زانستی بوو بۆ وان کاودانێن مرۆڤی یێن دژوار یێن پشتی هاتنا داعش.

پاشی، سەرۆکێ زانکۆیا دهۆک خۆشحالیا خۆ ب ڤێ سەرەدانێ دەربڕی، کو نیشانا گرنگیدانا بەردەوام یا حکومەتا ئەلمانیایە ب ڤی پرۆژەی، و ئاماژە دا کو IPP بۆ زانکۆیا دهۆک "پرۆژەکێ ئایکۆنی" (Iconic Project) یە و کادرەکێ مەزن و خودان شیان د بیاڤێ ساخلەمیا دەروونی دا ئاڤا کریە. د. ئەتروشی هەروەسا ئاماژە دا گرنگیدانا زانکۆیێ ب ڤەکۆلینێن گرێدای ب جینۆسایدێ ڤە و راگەهاند کو د ڤێ مەهێ دا، ئێک ژ مەزنترین کۆنفرانسێن ناڤدەولەتی ل دۆر جینۆسایدێ ب سەرپەرشتیا جەنابێ سەرۆک مەسعود بارزانی دێ ل زانکۆیا دهۆک هێتە گێران.

ژ لایێ خۆ ڤە، رێزدار فلۆریان هاسلەر خۆشحالیا خۆ دەربڕی کو جارەکا دی سەرەدانا زانکۆیا دهۆک دکەت و ئاڤاهیێ نوی یێ IPP دببینیت، و گۆت: "IPP پرۆژەیەکە کو نە بتنێ ئەم ل هەرێما بادن-وۆرتمبێرگ، بەلکو دەولەتا ئەلمانیا هەمی شانازیێ پێ دبەت." وەزیری جەخت کر کو ئەو دێ بەردەوام بن لسەر پشتەڤانیکرنا ڤی پرۆژێ سەرکەڤتی.

ل دویڤ دا، مامۆستا و چارەسەرکارێن پەیمانگەهێ دیتنەکا گشتی لسەر پرۆژەیێن خۆ یێن جودا پێشکێشکرن، ژ وان ژی پرۆگرامێ ماستەرێ، کلینیکا شنگالێ، و هێلا گەرما رێگرتنێ ل خۆکوشتنێ.

ئێک ژ خالێن هەرە گرنگ یێن ڕێورەسمی، ڤەکرنا دەرگەهێ دانوستاندنێ بوو د ناڤبەرا وەزیرێ ئەلمانی، پرۆفیسۆر کیزیلهان، و دەرچووی و قوتابیێن پەیمانگەهێ دا، کو تێدا سەقایەکێ بەرهەمدارێ دیالۆگێ ل دۆر ئاریشە و پێشڤەچوونان دروست بوو.

ل دوماهیێ، شاندێ مێهڤان گەریانەک د ناڤ ئاڤاهیێ نوی یێ IPP و کلینیکا چارەسەریا ئالۆدەبوونێ دا کر. ئەڤ سەرەدانە دوپاتکرنەک بوو لسەر بهێزیا پەیوەندیێن ئەکادیمی و مرۆڤی یێن د ناڤبەرا زانکۆیا دهۆک و سازیێن ئەلمانی دا و گرنگیا کارێ هەڤپشک د خزمەتکرنا جڤاکی دا.

ڤێرە كلیك بكە بۆ دیتنا وێنەیان

نڤیسینگەها راگەهاندنا زانکۆیا دهۆک؛ ٢١ـی چریا ئێکێ ٢٠٢٥

راپۆرت: عسمەت مەحمود محەمەد

وێنە: محەمەد عەبدولکەریم تاهر، و عەلی حەبیب حەبیب